Seminario "El habla de Fonz. Aragonés Ribagorzano"

El 24 de noviembre, en el Zentro Aragonés de Barzelona, Manuel Marqués mos va ufrir un seminario sobre el charrar del suyo llugar, Fonz. Con uns 1000 habitans, Fonz ye una de las comunidaz an la lluenga aragonesa ye més viva autualmén. Marqués va descrivir el suyo contesto sozial y istorico, y va charrar de l’uso que se i da a l’aragonés: per exemplo, que se charra muito en es comerzios u en la carrera, pero que con el medico u en el banco se gosa empllegar el castellán.

Maguer ofizialmén ye de la Zinca Meya y tiene més relazión economica con el Somontano, Fonz ye parti de la curiosa comarca llinguistica de la Ribagorza, an conviven aragonés, catalán, y una serie de charrars de transizión. L’aragonés de Fonz empllega muitas de las formas parellanas al catalán que s’alcuentran en el ribagorzán, con la caida de -r final (dixá, mullé) u la palatalizazión d’ l- inizial (llengua, llargo). Tamén se i palataliza l- dezaga de bels consonants (pllaza, cllau, dobllá) como en toda la Ribagorza. A més de las suyas carauteristicas foneticas, Marqués va descrivir bels aspeutos de la gramatica del fonzense, como per exempllo l’empllego del preterito perifrastico ribagorzán (vaz chugá).

Pa veyer l’apllicazión de todas istas carauteristicas llinguisticas y exempllos de l’empllego del fonzense, Marqués va presentar una série de documentos variaus en iste charrar. Antimás de testos literarios (como poemas) y testos formals (como un articllo d’opinión), va presentar atros menos formals (como publlicazións de Facebook) que amostran que el fonzense ye prou vivo sozialmén.

Dimpués de veyer exempllos variaus de l’empllego del fonzense (gravazións llinguisticas, un grupo mosical que i canta, obras de teatro...), se va rematar el seminario con un debate ubierto sobre la relazión llinguistica entre Fonz y la resta de l’Aragón y las suyas particularidaz, tanto linguisticas como soziolinguisticas. Va ser un dia complleto con una visión muito complleta del fonzense como variedat viva de l’aragonés.

Muitas grazias al corrinchaire Manuel Marqués pa compartir l’aragonés del suyo llugar con toz nusatros, y grazias á toz es que van acudir al primer seminario d’iste curso!

Marqués mos amostra el fonzense á internet

II Zicllo de seminarios sobre la llengua aragonesa - Cronica del segundo seminario

El sabado, 10 de febrero, se va fer el seminario “Millorando lo nuestro modelo de lengua”, dirichiu por Chusé Raúl Usón. I van partizipar unas 18 personas, que van acudir de maitín ta’l Zentro Aragonés de Barzelona con ganas de conoixer las propuestas d’Usón pa la llengua aragonesa.

Usón ye escritor y poeta en aragonés, presidén de la Soziedat de Lingüistica Aragonesa, tradutor y miembro del Consello Superior de las Llenguas d’Aragón, y antismás diriche l’editorial Xordica. Va enzipiar la suya presentazión contán l’istoria de la suya relación con la llengua. Tamén va fer un chicot resumen de l’istoria d'es intentos en las zagueras decadas d’estandardizar-la, eliminán castellanismos y creán una koiné u llengua comuna. Va meter espezial emfasis en l’idea que, de momento, no existe denguna autoridat llinguistica que pueda crear una koine efectiva, y que por tanto ye important basar l’aragonés que emplleguem en bella variedat viva de la llengua.

Alavez, Usón va charrar de bel elemento basico de la gramatica, como es articllos y la suya apostrofazión, es promombres u es demostrativos. Va argumentar que yera importán respectar la coderenzia cheografica de la llengua; por exemplo, si s’empllega el sistema d’articllos orientals (el, e[l]s, la, las), diz que cal utilizar tamén atras formas orientals (e.g. alavez y no allora). En una posiblle llengua comuna, tamén argumentava á favor de l’uso de las formas más chenerals u más documentadas, maguer sigan parellanas con el castellán. L’escritor va insistir que en sacar es castellanismos de l’aragonés, yera importán no enpobrir la llengua con l’eliminazión de parolas aragonesas á favor de sinonimos que marquen distanzia con el castellán.

Dimpués de tocar la gramatica, Usón va pasar á zentrar-se en el lecsico, fendo critica de bella parola que s’empllega asovén en l’aragonés escrito que, segun l’escritor, ye poco documentau u un neolochismo inezesario. Pa Usón, agora mesmo la llengua aragonesa no s’alcuentra en un punto an se puedan crear muitos neolochismos. Diz que istos cambeos solo influyen la llengua d’es usuarios de la llengua escrita, distanzián-la de la llengua d’es fabllans patrimonials. Va chenerar un debate animau, por exempllo, en nombrar la parola "chambreta", que Usón considera un neolochismo inezesario pa "camiseta". Maguer no toz es presents tenivan la mesma opinion sobre ista voz, la conversa va sacar muitas cuestions interesans relazionaus con l’istoria de la llengua, el suyo uso por parti de diferens sectors de la soziedat, y como querem que siga en un futuro.

Tamén van sallir una serie de cuestions foneticas interesans, como es cambeos en las vocals atonas (triballo, troballo, treballo) u el tratamiento d’es grupos consonanticos cultos (pauto, pacto). En cheneral, Usón se va mostrar a favor de respeutar las formas etimolochicas.

Dimpués de minchar, el grupo va mirar-se una serie de testos de creazión recién (notizias, cartels, tweets...), mirán exempllos de las cuestions que evan tratau de maitín. Feito isto, el seminario se va concluir con unas zagueras parolas d’agradeiximiento d’el corrinchaire Pau Arbués y con la distribuzión de dipllomas. Dimpués d’un dia complleto, es partizipans se van despedir.

Dende O Corrinche, querim dar las grazias á Chusé Raúl Usón per contar-mos la suya visión pa la llengua, á José Enrique Gargallo de l’UB y l’Institut d’Estudis Catalans per la suya partizipazión, y á toz es que van acudir ta’l seminario per aduyar á fer de Barzelona un llugar an l’aragonés ye bien vivo.

Usón charra con es partizipans de la suya visión pa l'aragonés.

 

II Ziclo de Seminarios sobre Lengua Aragonesa

II Ziclo de Seminarios sobre la Lengua Aragonesa - Cronica d’o primer seminario

Con o tetulo L’aragonés en o mundo vechetal se fazió lo pasau 28 d’octubre n’os arredols d’a ziudat de Berga, lo primer d’os tres seminarios que la colla de charradors “O Corrinche” d’o Centro Aragonés de Barcelona (CAB) ha programau pa lo curso 2017/18.

Contó con a colaboración de José Enrique Gargallo d’o Institut d’Estudis Catalans (IEC) que va dirichir unas parolas de bienvenida pa la quinzena d’asistens e que introduzió a lo director d’o seminario, Rafel Vidaller Tricas, achén de mon n’o Alto Galligo, miembro d’o Consello d’a Fabla Aragonesa (CFA) y autor de libros y dicionarios de conteniu botanico y faunistico así como de guías de montaña.

A las 10.30 comenzipió lo primer itinerario zircular n’as selvas d’o santuario de Queralt, fendo bellas paradas pa reconoixer y fer analisi visual d’as diferens espezies vechetals. N’o primer puesto se va aproveitar que yera achardinau con arbols ornamentals pa comentar las espezies foranas. Dimpués enfilamos por lo bosque de solana y lo mirador de Sant Ignasi, con una gran envista d’o Baix Berguedà y d’El Bages, dende do se veyeban los mons d’o Montseny, Sant Llorenç de Munt y Montserrat. Un poquet mas entadeván, n’o mirador de la Garreta se charró tamién d’aspectos cheolochicos (formazión d’o Pirineu) y climaticos (cambios periodicos) y la suya influenzia n’a transformación d’as selvas. La ruta continó ent’o Norte y antes de dentrar n’o paco se va fer una parada n’a capella de Sant Joan pa almorzar. Dimpués, lo camín va seguir por una selva de faus y pins dica lo aparcamiento d’o santuario. Por las condizions morfolochicas d’o lugar se vioron plantas propias de roca.

A meyodía, lo grupo fazió un minchar d’alforcha en l’aria de La Font Negra. Vidaller va repartir entre los asistens una lamina con fotografias d’animals d’o Pirineu de gran calidat y una atra con imáchens d’ilesias d’o Sarrablo y un libret de remedios medizinals, con as propiedaz d’os vechetals y un listau d’espezies d’arbols, matas y flors que se troban n’os itinerarios, agrupaus seguntes las suyas rechions biochograficas.

Dimpués fiziemos lo itinerario de La Font Negra que transcorre por la selva de ribera en que se va destacar lo caráuter azonal d’a vechetazión con necesidaz d’humedat mas exichens.

Pa rematar, los partizipans van prener un café n’a ziudat de Berga que dio paso a la tertulia. A las 18:00 y n’o Bar La Plaça, Vidaller presentó un d’os suyos treballos: Lo lexico d’a flora en aragonés dende l’antropolochia lingüistica. L’autor nos va explicar aspectos taxonomicos d’as diferens espezies, nivels de clasificazión (plurals, selvas…) y los vinclos creaus entre la soziedat y los vechetals. La partizipazión activa d’os asistens con as suyas aportazions de  nombres de vechetals reconoxius por els en diferens varians dialectals fue sobrebuena asinas como aspectos de medizina tradizional y emplegos en ganaderia, artesania, etc.

Cal agradeixer a Joan Vallès, catedratico de Botanica d’a Universitat de Barcelona y filologo miembro d’o IEC, los suyos comentarios. Vallès li va entregar a Tricas la publicazión  Noms de plantes. Corpus de fitonimia catalana, an se replegan y tratan mas de 58.000 espezies.

Los asistens rezibioron un diploma personalizau acreditativo d’a suya partizipazión n’o seminario.


Carles Arbués

Foto d’o grupo, en Queralt.

De piet, y d’izquierda ta dreita: Arturo Mahiques, Ramón Villacampa, Andreu Comas, Antonio de la Rosa, Silvia Pérez,

José Arbués, José Enrique Gargallo, Alicia Castán, Pau Arbués, Joan Vallès , Xavier Arbués.
Acochaus: Carles Arbués, Julia, Luís López, Rafel Vidaller.

La Pilar surt al carrer

Cartel feito durante a salida de Pilar ta carrera, por Olartz.

A Pilar salíe ta ra carrera, de la man d'Azagra y Revuelta.

Grazias compañers!

Presentazión d'os Cursos de Lengua Aragonesa 2017-2018. CAB y UB

Nuebas contribuzions de José Lera Alsina en Bisas d'o Subordán.