viernes, 12 de enero de 2018

II Ziclo de Seminarios sobre la Lengua Aragonesa - Cronica d’o primer seminario

Con o tetulo L’aragonés en o mundo vechetal se fazió lo pasau 28 d’octubre n’os arredols d’a ziudat de Berga, lo primer d’os tres seminarios que la colla de charradors “O Corrinche” d’o Centro Aragonés de Barcelona (CAB) ha programau pa lo curso 2017/18.

Contó con a colaboración de José Enrique Gargallo d’o Institut d’Estudis Catalans (IEC) que va dirichir unas parolas de bienvenida pa la quinzena d’asistens e que introduzió a lo director d’o seminario, Rafel Vidaller Tricas, achén de mon n’o Alto Galligo, miembro d’o Consello d’a Fabla Aragonesa (CFA) y autor de libros y dicionarios de conteniu botanico y faunistico así como de guías de montaña.

A las 10.30 comenzipió lo primer itinerario zircular n’as selvas d’o santuario de Queralt, fendo bellas paradas pa reconoixer y fer analisi visual d’as diferens espezies vechetals. N’o primer puesto se va aproveitar que yera achardinau con arbols ornamentals pa comentar las espezies foranas. Dimpués enfilamos por lo bosque de solana y lo mirador de Sant Ignasi, con una gran envista d’o Baix Berguedà y d’El Bages, dende do se veyeban los mons d’o Montseny, Sant Llorenç de Munt y Montserrat. Un poquet mas entadeván, n’o mirador de la Garreta se charró tamién d’aspectos cheolochicos (formazión d’o Pirineu) y climaticos (cambios periodicos) y la suya influenzia n’a transformación d’as selvas. La ruta continó ent’o Norte y antes de dentrar n’o paco se va fer una parada n’a capella de Sant Joan pa almorzar. Dimpués, lo camín va seguir por una selva de faus y pins dica lo aparcamiento d’o santuario. Por las condizions morfolochicas d’o lugar se vioron plantas propias de roca.

A meyodía, lo grupo fazió un minchar d’alforcha en l’aria de La Font Negra. Vidaller va repartir entre los asistens una lamina con fotografias d’animals d’o Pirineu de gran calidat y una atra con imáchens d’ilesias d’o Sarrablo y un libret de remedios medizinals, con as propiedaz d’os vechetals y un listau d’espezies d’arbols, matas y flors que se troban n’os itinerarios, agrupaus seguntes las suyas rechions biochograficas.

Dimpués fiziemos lo itinerario de La Font Negra que transcorre por la selva de ribera en que se va destacar lo caráuter azonal d’a vechetazión con necesidaz d’humedat mas exichens.

Pa rematar, los partizipans van prener un café n’a ziudat de Berga que dio paso a la tertulia. A las 18:00 y n’o Bar La Plaça, Vidaller presentó un d’os suyos treballos: Lo lexico d’a flora en aragonés dende l’antropolochia lingüistica. L’autor nos va explicar aspectos taxonomicos d’as diferens espezies, nivels de clasificazión (plurals, selvas…) y los vinclos creaus entre la soziedat y los vechetals. La partizipazión activa d’os asistens con as suyas aportazions de  nombres de vechetals reconoxius por els en diferens varians dialectals fue sobrebuena asinas como aspectos de medizina tradizional y emplegos en ganaderia, artesania, etc.

Cal agradeixer a Joan Vallès, catedratico de Botanica d’a Universitat de Barcelona y filologo miembro d’o IEC, los suyos comentarios. Vallès li va entregar a Tricas la publicazión  Noms de plantes. Corpus de fitonimia catalana, an se replegan y tratan mas de 58.000 espezies.

Los asistens rezibioron un diploma personalizau acreditativo d’a suya partizipazión n’o seminario.


Carles Arbués


Foto d’o grupo, en Queralt.
De piet, y d’izquierda ta dreita: Arturo Mahiques, Ramón Villacampa, Andreu Comas, Antonio de la Rosa, Silvia Pérez,
José Arbués, José Enrique Gargallo, Alicia Castán, Pau Arbués, Joan Vallès , Xavier Arbués.
Acochaus: Carles Arbués, Julia, Luís López, Rafel Vidaller.