martes, 11 de noviembre de 2014

Lo canaril de Susuéi

Triballo de Pepe Lera amaneciu lo biernes 7 de nobiembre en pirineodigital.com. Aquí tenez l'enrastre a l'orichinal.

LO CANARIL DE SUSUÉI

Caminando ta las espelungas de Susuéi, por la endrecera de dimpués de Santalucia y aguas ta baixo de lo Veral, me cuentan que, entre las cinco pardinas d’esta zaona, quasi plegaban ta lo centenar las bordas que se devantaban por estos paraches. Tamién me se diz que, quando la invasión de los gabachos y la crema de lo lugar d’Echo, dos siglos tazaga, muitos vecinos fuyeron enta aquí p’acomodar-se en estas bordas como segundas viviendas y escapar de las fusilas de Napoleón. Conforme ves puyando y abanzando chino-chano, te trobas con buena pila de paretz, pareteras y paretons fundius u a meyo fundir, como igual bordas u cubilars; todo ixo ye buena preba de quanto me vienen contando. Dende lo puesto de la borda de Lo Lobet, que agún aguanta pro guallarda y que ye punto de cruce con la endrecera que viene dende Echo por lo Subordán aguas ta baixo, ya veyes un foraz en meyo de la penya, como si estase un cau chigant, como un teatro griego pero siempre a cubierto. 

En pleno mes de diciembre, lo mont por estos pacos y solanas ye todo pardo y triste como los campos todos, tan chiquetz como los huertos. Las follas, xutas y resequidas en tierra, nos han feito d’alfombra quasi hasta plegar ta lo primer covachón de Susuéi, en do se planta cada anyada lo belén en miniatura que levan los chesos. A lo que plegas, y dentro ya d’ixa cava monumental, quasi catedralicia, sintes lo gran cobeixo que t’acaba d’amprar la naturaleza. La solemnidat de los primers minutos ye tal que te plantas como un pasmarote, quedo, aguardando convenciu de que una ulor a incienso lo implirá todo, a escape. No será asinas, claro, y lo fumo de las xeras, cremando lenya pa fer las migas y la panceta, se xamplará por todo l’aposento en una manyana de sol pleno y en la que no mueve l’aire ni a empuixons. Lo auditorio natural mira de cara ta lo sur por lo que, en pleno verano, ye facil adominar que ixas fronteras itarán fuego. Por alto, y en meyo de la visera de la espelunga, acucuta un espolón de penya por do s’esliza una chorrotera d’agua, un goteril de contino, de los chelos u las nieus que se desfan por agún mas enta alto. Sin remeyo, l’agua se suicida por lo barranco enta baixo.

Mientras los voluntarios de contino ya i son escatizando en los fogons, femos una escapadeta ta la segunda espelunga, a un paso. Ye de otra traza: menos auditorio, con lo foraz mas deformau y con las margas a la vista mas estiraciadas. Se plega por un curto puyadón, sembrau de bolos de hasta cinco metros, esgallaus de lo macizo pero que no han podiu alcanzar, rodando, la galochera de debant. Si alzas la mirada ta trenta metros d’altura se distingue una ampla alcoba, alera, alto de todo de la espelunga, que amuestra las paretz afumadas, negras, sulsidas, carbonizadas. Me se dice allora que enfile bien los uellos ta lo suyo teito, hasta que me apercate como de una trave de dos u tres metros… ¿Astí metida por la mano de l’hombre u por la naturaleza? ¿Ye un tronco, un fierro, solo un ‘efecto visual’? Pa yo, todo un misterio pos ni la mía maquina de fotos m’aduya a descifrar-lo. Los d’alredor mío me dicen lugo que apure la vista pos ne bi ha dos, de traves mas, anque chiquetas. Las me preixino en lo tozuelo porque no atino a vier-las. Tal como s’amuestra lo macizo en ixe punto, todo a margas apiladas, parez que ta ixa alcoba hesen podiu plegar (siempre a duras penas) los humanos y acomodar-se quando lo macizo no se’n yera agún esgallau. ¿U sí? ¿Pa cutio u de paso? ¿Con quala estratechia, militar u domestica? ¿Quantos anyos tazaga? ¿Siglos, milenios? Diz que dende baixo han itau penyas y tuixos ta la trave pa escuitar lo son y lo leco de lo choque; por si se queixa como fierro u como talla; ¿de chaparro? En ixe aposento, seguro, aduerme una feta por descubrir y un rosario de feitos a contar. “Por lo fumo se sabe en do ib’ye lo fuego” y , por los mascarons, lo infierno. ¡Bi ha que tirar-li ixe velo a Susuéi! Por si amanece astí bell canaril, por si s’espellataban animals en ixas traves u s’aforcaban enemigos. Me faría goyo estar antropologo y escalador a un tiempo pa poder-li tirar ixe velo; pero yo solo tanyo y canto y, quando me vaga, escribo.


José Lera Alsina, 2014