Nuebas contribuzions de José Lera Alsina en Bisas d'o Subordán. 

Canal de Youtube de BRIN TEYATRO

Ya tenemos aquí lo canal de Youtube de BRIN TEYATRO, la colla de teyatro de lo grupo O Corrinche y los cursos d'aragonés del Centro Aragonés de Barzelona. Asperamos que tos cuaquen y que tos faigaz suscritores pa poder beyer los bideos que iremos puyando.

Canal de Youtube de Brin Teyatro

Presentazión d'os cursos d'aragonés 2015-2016

Con l'agüerro empezipiamos un atro curso d'aragonés, y ya en ban 18. Os mayestros y alumnos empezipian a coordinar-se y bi a rebolizio discutindo as autibidaz que se desembolicarán, y parando a presentazión. 

Iste año se'n ferán dos, de presentazions. A primera estará  a ras 19:30 d'o diya 6 d'Otubre en l'Aula Capella, de la Universitat de Barcelona, grazias a o refirme de José Enrique Gargallo (Profesor Titular del Dept. de Filologia Romànica de la UB). A segunda presentazión estará en o Centro Aragonés de Barcelona, a ras 19:30, d'o diya 13 d'Otubre.

Contamos tamién con a presenzia de Lluís-X. Flores Abat y con l'autuazión mosical de Kike Ubieto. 

Tos asperamos!

O Corrinche

Remate d'as "Chornadas sobre Irlanda, lengua, mosica y cultura"

O biernes 12 rematón as “Chornadas sobre Irlanda, lengua mosica y cultura”, organizatas por a Colla de Charradors o Corrinche en colaborazión con a Universitat de Barcelona y o Centro Aragonés de Barcelona.

Os actos d’o biernes empezipión con a charrada de King Sweeney en l’edifizio Josep Carner d’a Universitat de Barzelona. Sweeney dio una bisión de diferens aspeutos d’a lengua irlandesa: os suyos orichens, istoria, estructura y mesmo a situazión sozio-lingüistica autual y perspeutibas de futuro.

O irlandés forma parte d’as lenguas d’orichen zeltico, y en l’autulidá tiene alto u baixo 40000 fablans, distribuyius en tres zonas prinzipals en a costa oeste d’Irlanda. Esiste un sistema d’escolarizazión en o que a lengua beicular ye l’irlandés, a libel d’amostranza primaria y bachillerato. A lengua ye presén en meyos de comunicazión y en a siñaletica. 

Seguntes Sweeney, a lengua tiene considerazión, mayormente entre a chen choben, pero ixo no quita que a presión de l’inglés contine fendola una lengua con pocas proyeuzión en o terreno sozial y profesional, situazión que seguntes o que escribe istas ringleras, posiblamén siga disglosica y remate en un prozeso de sustituzión lingüistica de l’irlandés por l’inglés. 

A la presentazión de Sweeney siguié un turno de preguntas, en as que en muitos casos se fazión cotimparanzas con a situazión soziolingüistica d’a lengua aragonesa y d’o suyo esdebenidero, más escuro que o d’o irlandés: sin d’amostranza en as escuelas, sin bisibilidá en meyos de comunicazión ni en programas educatibos, y con a transmisión chenerazional crebando-se. 

Asistens a la chornada en a terraza d'o edifizio Josep Carner d'a
Universitat de Barcelona

Manimenos, a la fin d’a charrada os asistens y organizadors puyón de buena gana ta ra terraza de l’edifici Josep Carner ta fer-se una foto de grupo. Astí remeramos que chuntos estabanos tamién fa un año en ixe puesto zelebrando a trobada “L’aragonés güé”. Dimpués, y de buen implaz, os asistens marcharon a zenar ta o Centro Aragonés de Barcelona. En rematar a zena, Mark Duffy dirixié a beilata mosical. Astí se cantó en irlandés, en inglés, y tamién en as tres lenguas d’Aragón. Uno d’os momentos más emotibos estió cuan Mark Duffy cantó “La quinta brigada”, tema en inglés que remera a os brigadistas irlandeses que luitón con os republicans cuentra o fascismo.

Mostra d'Entitats al Born

Iste sabado, 18 d'abril estiemos en a Mostra d'Entitats acompañando a ra Plataforma per La llengua en a suya campaña Jo em planto pel català. Ista mostra aculle as organizazions que representan y luitan por as diferens bariedaz lingüisticas que se i pueden sentir en Barzelona. Como de cutio, O Corrinche y os escolanos d'os cursos metemos una paradeta an trobar libros y material en aragonés y mesmo d'o catalán d'Aragón.

Dissabte 18 d'abril, de 10 a 14h.
Plaça Comercial, Barzelona

http://ocorrinche.blogspot.com.es/

http://www.plataforma-llengua.cat/que-fem/noticies/2817/aquest-dissabte-joemplanto-pel-catala-a-la-placa-del-born-de-barcelona

L'Aragonés en la University of Georgia

El zinco de marzo, Andreu Comas, miembro de la Colla de Fablans "O Corrinche", ba charrar de la lluenga aragonesa con es alumnos de filolochía de l'Unibersidat de Georgia (EE.UU.).

Ya ye el segundo año que el Profesor Timothy Gupton, espezialista en luengas iberoromanicas, combida el Corrinche á charrar con es suyos alumnos sobre l'istoria y la situazión autual de l'aragonés. Igual que l'año pasau, la cllase se ba fer per Skype, dende Barzelona ta Athens, Georgia.

Dimpués d'una chicorrona presentazión sobre la cheografía de l'aragonés y beluns d'es suyos probllemas autuals (la dialeutalizazión, la falta de conzienzia llinguistica, la espobllazión, etz.) se ba deixar un ratet pa que es alumnos fesen preguntas. Se ban mostrar espezialment sorprendius por a bergüenya que muitos d'es fabllans patrimonials tienen de la suya lluenga, y como l'amagan debán d'es esconoixius. Bale la pena remarcar que maguer que muitos aragoneses estan acostumbraus á ista situazión, dende difuera se gosa bier con sopresa y incomprensión. Se ba contrastar la penosa situazión autual de la luenga con la de l'edat meya, cuan era luenga de reis, de cultura y de l'administrazión, y se ba asenyalar el triballo d'esprestichio feito dende las escuelas como uno d'es culpablles prenzipals de la situazión autual. Es alumnos nortamericans tamién ban mostrar la suya sorpresa en saper que, maguer tener un gobierno propio, la soziedat aragonesa no ha estau capaz de normalizar la situazión d'una de las suyas lluengas propias. 

Dende el Corrinche querem dar las grazias ta el Profesor Gupton y es suyos alumnos per la suya imbitazión, y dizir cuanto mos ne fa, de goyo, que dende tan luen la chen s'interese per la nuestra lluenga. Esperem bier-mos más en el futuro!

Mapa repartiu entre es alumnos

V Calçofabla en Tarragona

El dia 14 de marzo, entre oliberas amán de las murallas romanas de Tarragona, se ba zelebrar la zinquena edizión de l'anual Calçofabla. Cada año, parixe que creixe más ista lifara: iste ha estau, de luén, l'edizión más multitudinaria d'ista calçotada feita en aragonés. Maguer bellas ausenzias notablles, i ban acudir un gran numero de militants del Corrinche, escolans d'es cursos d'aragones, simpatizants y amigos. El diya ba comenzipiar con un almuerzo chicorrón ta es boluntarios, que ban estar tot el maitín preparant es calçots, la carni, carchofas y grans cantidaz de tiramisú. Iste almuerzo ba empalmar con el bermut, que ba continar dica l'ora de minchar; el minchar se ba allargar dica que se n'eba iu el sol, y no ba rematar dica que s'esen acotolau el repertorio abitual de cantas en aragonés, catalán y belatra luenga bezina. Profés que la mezclla sedutora de minchar, cantas y calibo ba serbir ta combertir més d'uno ta la causa de la luenga aragonesa.

Dende el Corrinche, querem felizitar á nuestra anfitriona, Alizia, per una atra calçofabla esitosa, y per aber creau l'alcuentro más important d'aragonesofabllants que se zelebra en Catalunya. Esperem ser-ne-ie encara més l'año benient!

A ronda entre el fumo d'es calçots

O Corrinche en a I Trobada de fablans de l'aragonés de Biscarrués

O zaguer dia 28 de febrero, acudimos una cuadrilla d'o Centro Aragonés de Barcelona ta Biscarrués ta ra I Trobada de fablans de l'aragonés.

Primeramén, mos achuntemos en o café A Barbacana, an dimpués d'a presentazión de cadagún de nusatros, comenzipiemos una gambadeta por o camín d'o Soto de Galligo dica l'achuntadero d'o barranco de Baduello. Allí nos amostrón: as nabatas, rastros de bichos como chabalíns y melons; camins nueus ubiertos en o canto d'o río; matas y arbols. Tamién o puesto an estarba l'entibo de Biscarrués, contra o cual ya fa 28 añadas que son en luita ta que no se faiga. En iste inte, a construzión de l'entibo agun no ye emprenzipiata. Rematamos fendo-nos una foto de conchunto y prebando o pernil y o bin d'o lugar, dimpués de besitar a Ruta d'a Piedra. En ista ruta se puet bier siñals en as puertas d'as casas, y se pasa por a ilesia d'o lugar.

Ya chentaus, ascuitemos a mosica interpretada por Virgílio Aljama y Alberto Lamora. Por a tardi, y bien descansaus, acudimos ta una charrada sobre os animals d'a Galliguera feita por José Antonio Cuchí. Á continazión se fizo a presentazión d'o libro Pedro Arnal Cavero: Somontano en Alto. Escritos (1946-1959) e inéditos, editau por Alberto Gracia Trell, d'Aladrada Ediciones (2014). A chornada remató con una zena de Salmorejo, an se consolidón os binclos entre os fablans benius no solo que d'Aragón, sino tamién de Cataluña y Nabarra. Isto contrimuesta a bitalidá d'os ligallos aragoneses aíntro y fuera d'Aragón.

Dende istas ringleras, os corrinchaires d'o Centro Aragonés de Barcelona felizitamos á os organizadors por o suyo triballo en esfensa d'a luenga.

Es asistens, entre es cualos bels corrinchaires

Presentazión de "Historietas d'un lugar d'as Cinco Villas"

O propasau diya 30 de chinero se fazié en o Centro Aragonés de Barcelona a presentazión d’o nuebo libro de José Arbués Possat “Historietas d’un lugar d’as Cinco Villas”. A sala Joaquín Costa, cuasi plena, aloxó  a 75 presonas, entre as cuals muitos fuencalderenses y deszendiens d’ixe lugar, pero tamién una representazión d’amigos y personalidaz, como por exemplo José Lera Alsina y José Enrique Gargallo (Universitat de Barcelona).

De izda. a dta.: Arbués, Barón y Usón

Estió o presidén d’o CAB qui ubrió l’auto remarcando o feito que dende que ye presidén (2014) ya s’han presentau en o CAB tres obras escritas en aragonés: a d’Anchel Conte, con “Luna que no ye luna”; a d’Alberto Lamora, “Mustang”; y ista zaguera de José Arbués. Isto endica a bitalidá d’a diaspora aragonesa en Catalunya y o suyo compromiso con as suyas radizes.

Interbinié a continazión l’editor, Chusé Raúl Usón (Xordica Editorial), qui a más de remarcar os binclos d’amistá con l’autor, chustificó a contribuzión que representa a obra de José Arbués a la cultura aragonesa. Dentrando en as "historietas", surayó como una d’as suyas balguas o feito que ye l’unico texto en barián dialeutal de l’aragonés que se emplega en as Zinco Billas. Ista ye emparentada con as de l’aragonés ozidental, ansotano y cheso. Tamién que, por a estrutura d’o conteniu, más de doszientos relatos curtos, o libro ye una aduya fundamental pa aprender l’aragonés. L’editor leyé una selezión d’istorietas, discutindo detalles lingüisticos, pero tamién pa ilustrar o conteniu tematico, dando exemplos d’aspeutos istoricos y etnograficos; y ta comentar o chenero, que tiene mesmo clabe d’humor como de crudeza reyalista. 

José Arbués se zentró en os aspeutos particulars de motibazión y elaborazión, endicando que o material alazetal estioron testimonios y bibenzias propias, replecadas y escritas en os zaguers 50 años. Arbués rezentó tamién a ebolución sozio-lingüistica de Fuencalderas, y o proceso de sustituzión de l’aragonés por o castellán. 

O publico fazió muitas preguntas y aportazions y, a petizión, l’autor interpretó dos istorietas, lebando a o público a boz d’os suyos antepasaus y o  soniu d’o biello aragonés de Fuencalderas. 

L’auto se zarró con as parolas d’o presidén d’o CAB, espresando o deseyo que se faiga a prezisa recuperazión d’o patrimonio lingüístico d’Aragón. 

IX Despertafolk!

El domingo 30 de nobiembre, maguer la plebia, se ba fer el IX Despertafolk! en el Zentro Aragonés de Barzelona. Iste año, antismás d'estar un puesto d'alcuentro d'es territorios de la Corona d'Aragón, estió una traza de remerar la suya causa común en la Guerra de Suzesión. Por isto, dimpuesas de la autuazión d'el grupo de bombos y tambors d'el zentro y que l'istoriador Jordi Ramos espllegase el contesto cheneral de la Guerra, Andrés Castro ba rezentar la istoria poco conoixida d'es aragoneses que ban luitar al lau d'es catalans en el sitio de Barzelona en 1714. Á continuazión se ba rezentar la istoria parellana d'es boluntarios mallorquins y balenzians.

O grupo de tambors d'O CAB en l'autuazión

Feitas as espllicazións istoricas, se ba pasar ta la parti cultural de l'auto. De primeras se ba fer una dosis doblle de cultura balenziana con la autuazión de la Colla Borumballa de dulzaina y tabalet y la del cantador Carles Dénia. Iste zaguer, acompañau d'un guitarrista, ba tocar una serie de cantas d'el repertorio tradizional balenzian y bella composizión personal. Finalment, el grupo mallorquin afincau en Barzelona Exiliats ba tocar cantas populars d'es Balears pa que ballasen es mallorquins presents y pa que belún más lo intentase.

En rematar las autuazións, se ba fer una zaguera muestra de chirmandat: es que ban querer ban minchar chuntos en el restaurant d'el Zentro. Asinas remató la contribuzión aragonesa, balenziana y malloquina a la comemorazión del trizentenario de la cayida de Barzelona en 1714.

                    Carles Dènia, en a izquierda, y o suyo acompañán, Pau Figueres.

O Corrinche a la "Fira d'Entitats" de l'11 setiembre

El chuebes, onze de setiembre --a Diada Nazional de Cataluña-- O Corrinche y la esposizión "L'Aragonés, lengua biba" ban ser presents en la Fira d'entitats d'el Paseig de Lluís Companys. Al lau de muitas atras organizazions en representazión de nazions sin estau, asosiazions culturals y coleutibos de toda traza, O Corrinche be rezibir la bisita de miles de personas que ban pasar per la fira al llargo del dia.

Antismás de bier la exposizión y aprender bella cosa sobre l'istoria y la autualidat de la nuestra llengua, es bisitants a la paradeta teniban l'oportunidat de mercar llibros u chambretas y informar-se sobre es Cursos d'Aragonés que s'organizen cada año en Barzelona  y as autibidaz d'O Corrinche. Muita chent con origens en Aragón u entusiastas d'as llenguas y culturas minorizatas se ban amanar a la paradeta pa espresar el suyo interés, y muitos mas que ni sisquier yeran conzients de la realidat llinguistica que tienen al lau tamién mos ban espresar a suya sorpresa y interés.

Ye pllatero que la Fira d'entitats que organiza el coleutibo Gent de la Terra ye una buenísma oportunidat pa informar el publlico catalán sobre la realidat d'a llengua Aragonesa, y esperem poder-ie ser altra begata l'año benient.

La parada d'O Corrinche

Y pa es que no i ban poder asistir, se ba realizar un reportache sobre la fira. O Corrinche tamién bi ye, al menuto 6:10!

http://vimeo.com/107344728

"L'Aragonés: lengua biba" en a Billa d'Ayerbe

O biernes dia 22 se fazió a presentazión d'a exposizión "l'Aragonés: Lengua biba" en Ayerbe, continada por charlas arredol de l'aragonés en a Galliguera y redolada (J. Arbués Possat y A. Gracia Trell) y sobre a situazión en l'amostranza (I. Campos Bandrés) y os plans de capazitazión de profesors d'o diploma d'espezializazión en lengua aragonesa (F. Nagore Laín). Presentó l'acto E. Ubieto, en representazión de l'ayuntamiento d'Ayerbe y estión también representans d'APIAC (D. Palacín y E. Coronas) con quien s'eba organizau l'autibidá. 

Bi acudión alto u baixo 35 personas mesmo d'Ayerbe que de Biscarrués, Conzilio, Boleya, Fuencalderas, Lobarre y Morillo. As charlas estión seguidas de turnos de palabra en os que se i charró mayormente d'a situazión autual de l'aragonés y d'a nezesidá de fer trangos dezidius pa que a lengua no s'amorte en a Galliguera. 

Uno d'os temas trataus estió o d'a nezesidá de fer un rechistro oral y escrito d'as alcordanzas d'os mayors. Tamién se charró de creyar un "paisaje" en aragonés como un meyo ta dinificar a  luenga. A construzión d'ixe paisache aragonés ye tan simple como fer que a lengua siga presén en puestos ubiertos a o publico. Una parte d'ixe paisache podeban estar cartels con bocabulario aragonés seguntes o comerzio, como por exemplo listas de pres o menus en aragonés en a restaurazión, os espiezes en as carnizerias y listas con imachens d'as frutas y berduras en a fruteria, asinas como os nombres d'os produtos de panaderia y repostería. Un atra parti d'ixe paisache aragonés serban os nombres d'as carreras, y agún más, como han feito en atros paises en os que caleba potenziar as lenguas minorizatas, meter cartels en puertas indicando azions como "empentar/empujar" o "escusaus/WC". 

Por o que fa a la enseñanza, se i charró d'os detalles socials y de as condizions claustrals que fan posible que l'aragonés pueda estar lengua vehicular en materias curriculars, o que ye un ochetibo alazetal ta ra dinificazión d' a lengua.

L'acto remató dos oras dimpués d'aber empezipiau y una parte d'os asistens zelebró dimpués l'encuentro acudiendo a un pase de cortos que se feba en o camping d'a billa. A beilata estió animata y de seguras simién d'azions conchuntas que farán que l'aragonés biba en l'esdebenidero d'a Galliguera.

Pau Arbués, 

Colla de Charradors O Corrinche

Expo "l'aragonés: lengua biba", con charla de Iris Campos Bandrés y mesa redonda en Laspuña

O diya 2 d'agosto, en l'espazio de Alter-Nativa, en Laspuña, se fazió a presentazión de la exposizión, una charla sobre a situazión de l'aragonés en l'amostranza publica y una mesa redonda. Bi acudión una quinzena de presonas, entre as cuals bi estión mayestros d'aragonés. En a mesa redonda se i charró mayormente d'a problematica y causas que fan que por más que o numero d'alumnos crexca, o que endica una buena disposizión sozial debán d'a lengua, os resultaus sigan poco afalagadors, por no estar l'aragonés patrimonial entre a mayoria d'os alumnos. Se i comentó que tanto como a boluntá d'as familias, que alazetal o concurso d'os claustros de profesors y a suya autitú por l'aragonés. En a escuela de Broto, grazias a la empenta d'o claustro, o curso binién se beiclarán materias curriculars en lengua aragonesa.

Cronica d'a primer Trobada "L'Aragonés güe"

O sabado diya 14 remató en Barcelona a primer trobada “L'Aragonés güe”. Ista se desembolicó seguntes o programa estableziu y contó com a partizipazión de cuasi zincuenta asistens, incluyindo una representazión dibersa, tanto de sectors de l'asociazionismo y unibersidaz, como chenerazional. Presentaron l'acto, José Enrique Gargallo (UB), Meritxell Simó (UB) y Jacinto Bello (CAB).

A bariedá tematica en as ponenzias y comunicazions estió prou ampla. Dende o punto de bista más zientifico cal destacar as implementazions de teunicas de chestión de bases de datos y d'espectrogramas, asinas como as comparazions fonoloxicas y gramaticals de l'aragonés con atrás lenguas (R. de Andrés, J. Simón, I. Ibarretxe, M. T. Moret, J.E. Gargallo y V. Franco). Atros contenius presentaus incluyeron vocabularios (B. Mott) discusions terminoloxicas (Ch. C. Bueno-Chueca) y perfils d'estudiosos d'a lengua aragonesa (A. Gracia). Por o que toca a o desembolique d'aplicacions y ferramientas dixitals ta l'aragonés abié as comunicazions presentadas por  J.P. Martínez Cortés.

J. C. Moreno-Cabrera dando a suya ponenzia combidada en a Sala Alumni de la UB. 

En o campo soziolinguistico abié contribuzions basadas en o seguimiento cuantificau d'os cursos d'aragonés en la enseñanza publica  (I. Campo Bandrés), mesmo que dende a perspeutiba sozial y pulitica (J. C. Moreno Cabrera, José Ignacio López Susín, J. Lera, Ch. X. Tomás-Arias, A. Lamora) como de proyeutos que cal enzetar o continar, mayormente un dizionario d'a lengua, independién de supeditazions lingüisticas (Ch. I. Nabarro) y de formazión de dozentes de l'aragonés (Francho Nagore) arredol d'una istoria y un plan detallaus de futuro ta o diploma d'espezialización en lengua aragonesa. Un atra bisión cheneral d'a lengua estió a que mos dio Toni de la Rosa, con a presentazión d'a exposizión itinerán l'Aragonés: lengua biba.

Partizipans en a Trobada (edifici Josep Carner, UB)

Entre as comunicazions y ponenzias bi abié turnos de preguntas y espazios de dialogo en os que se i compartión ideyas que han propiziau una bisión conchunta y completa d'a situazión autual d'a lengua aragonesa. Tamién bi abié tiempo ta ra mosica, de radiz con “La Chaminera”, y de cantautor con Kike Ubieto. Y, profes, momentos ta la manifestazión espontanea de sentimientos de comunidá, como a que bi abié cuan José Lera, acompañau con o curdión por Angel Vergara, dirixió a canta conchunta de “S'ha feito de nuei” en o remate d'a zena d'a Trobada.

L'ultimo acto d'a trobada estió una caminadeta por puestos aragoneses de Barcelona, empezipiando en o Centro Aragonés, y a carrera Joaquín Costa, con referenzias a Segundo de Chomón, y tamién a os anarquistas aragoneses. A gambadeta continó dimpués por puestos relazionaus con: Santiago Ramón y Cajal,  la “Coronela” d'os aragoneses que luitón en a guerra de suzesión, l'archibo d'a Corona, y os reyes aragoneses en Barzelona. Seguro que feba muitos años que no se i charraba aragonés por ixas carreras y puestos, como por exemplo en as escaleras an bi abié l'atentau cuentra Fernando o Catolico, debán d'as puertas d'o palazio reyal, en l'antiguo ospital de Sant Pau, o en "El Fossar de les Moreres", an se zarrón os actos. 

Durante dos diyas, a lengua aragonesa ha tornau ta Barcelona, ta creyar binclos enriquidors y fortals, ta constatar que no se i rebla en a luita por a conzenzia de l'aragonés. Como parti d'a diaspora aragonesa en Catalunya, pero conscién d'o suyo orixen, a colla de Charradors O Corrinche agradixe a toz a partizipazión en a Trobada, porque L'Aragonés ye güe más fuerte que ayer entre nusatros.

L'Aragonés güe

Coinzidindo con a luna plena de chunio, a trobada L’aragonés güé pretende reunir en a Unibersidá de Barzelona a representans d’o mundo academico y de l’asoziazionismo cultural en un dezidiu exerzizio de “transbersalidá” zebico-zientifica.

Os dos ponens combidaus a l’alcuentro están referens a l’ambito d’a filolochía:

Ramón de Andrés, profesor tetular d’o Departamén de Filolochía Española d’a Unibersidá d’Obieu (Universidá d’Uvieu).

Juan Carlos Moreno Cabrera, catedratico d’o Departamén de Lingüistica, Lenguas Mudernas, Loxica y Filosofía d’a Zenzia d’a Unibersidá de Madrí.

O bloque academico estará completau con comunicazions binculadas á o tema cheneral Proyeutos y esperenzias ta o estudio y a promozión d’a lengua aragonesa. Amás, se presentarán a esposizión L’aragonés, luenga biba y dibersas propuestas culturals. Entre istas ultimas, a autuazión de La Chaminera y una besita enfilada á os puestos con bel significau aragonés d’a ziudá de Barzelona.

José Enrique Gargallo
Presidén del comité organizador

Pau Arbués
Secretario del comité organizador

Contacto: aragonesgue@centroaragones.org

L'aragonés güé/L'aragonés avui/El aragonés hoy

Situazión:

Paradetas San Chorche 2014‏

O miércols 23 d'Abril bi seremos presens en a carrera en a chornada de San Chorche por partida dople. Si tos baga mercar bel libro u bel produto cultural aragonés aquí tenez as nuestras coordenadas: 

Paradeta 1. (7h-22h)

Ramblas, 1 PARADA: 181

Organiza: Dictricte Ciutat Vella (Ajuntament de Barcelona)

Paradeta 2. (17h-20h)

Pl. dels Àngels (debán d'o MACBA)

Organiza: Plataforma per la Llengua

https://www.plataforma-llengua.cat/noticies/interior/2585

Tos i asperamos!!

Entalto Aragón!!

4a Chornada InterCulturalBCN: Os atros aragoneses

Sábado 15 de marzo 

4a Jornada InterCulturalBCN: Els Altres Aragonesos
La 4a Jornada InterCulturalBCN ha volgut reivindicar una cultura molt més propera, tot i que injustament poc coneguda per la majoria de la població de Barcelona, la cultura Aragonesa.

Des de l’última dècada del segle passat s'ha desenvolupat una activitat cultural estable sobre l’Aragó més desconegut, que malgrat la inabastable oferta d'aquesta ciutat han estat d’una humil però digne i amplia representació: Cursos de llengua i de música, exposicions, concerts, conferències, jornades, festivals, campanyes de suport, gastronomia,...

11:00h Cercavila per Escuela Música Tradicional Xixena amb el gegant de Labordeta (APOMAGA)
11:30h Inauguració exposició Luenga biba
12:00h Taula rodona Sobre l’aragonés
13:00h Vermut musical per DJ Gurrión
14:00h Dinar popular (Preu: 8 €)
16:00h Recital de Poesia per Anchel Conte, Andrés Castro i Alberto Lamora
17:00h Curtmetratge: Ambistas / Anvistas amb la presència de Iris C. Bandrés
18:00h Concert de Kike Ubieto i la Wall Street Band, presentant el disc Pan y Circo
19:00h Concert de Marta Casas Quartet presentant el disc Soniando (Folk Aragonès amb arranjaments Jazz)
20:00h Concert de Chundarata! (Folk Aragonès)
21:00h Concert d’Os Chotos (Folk irònic i combatiu)

Preus concert anticipada: reserves a info@interculturalbcn.net 12€ • Socis del CAT o CAB*: 10€
Codetickets.com 20€ (dinar + entrada) • Taquilla: 14€ • Socios del CAT o CAB* 12€ (*Centro Aragonés de Barcelona)

Centre Artesà Tradicionarius
Plaça d'Anna Frank - Barcelona (Metro Fontana)

http://www.tradicionarius.cat/ca/4a-jornada-interculturalbcn---els-altres-aragonesos/programacio/67

Ciclo Luengas y Nazions en La Barraqueta

Calendario 2014 con as fiestas estatals, de Aragón y Catalunya

 

Kike Ubieto, Chundarata y O Corrinche en a rueda de prensa d'inaugurazión de Tradicionarius 2014

O miércols diya 8 de chinero, Kike Ubieto y miembros de Chundarata y d'o Corrinche, asinas como a compañera Marta Casas, acudieron a ra rueda de prensa inaugural d'o Tradicionarius 2014, en o que partiziparán en un diya d'aprosimazión a ra cultura aragonesa con mosicas y una chornada d'esposizión y debate.