Chornadas en Tarragona sobre las lluengas d'Aragón y la identidat

El cabosemana del 27 y 28 de chunio se ba zelebrar en Tarragona as chornadas A la Franja i als Pirineus, tots i totes dempeus! Istas chornadas, una colaborazión entre O Corrinche y el Casal Popular Sageta de Foc, ban ser una oportunidat pa charrar de las lluengas propias d'Aragon y la relazión entre lluenga i identidat.

El dia de biernes se ba dedicar a la Francha; ba acudir Loli Gimeno, miembro de l'ASCUMA (Associació Cultural del Matarranya), pa charrar de l'autualidat de la luenga catalana en Aragón. Maguer la suya analisis ba estar prou negatibo, tamién ba indicar bels motibos d'esperanza, como que l'uso a de las nuebas tecnolochías como Whatsapp u Facebook han feito que es franjolins s'acostumen a empllegar la suya lluenga tamién pa la comunicazión escrita. En representazión de la cultura en catalán en Aragón, bi eba present tamién la exposizión Desideri Lombarte: Ataüllar el món des del Molinar, obra tamién de l'ASCUMA.

O sabado 28 de maitins, las chornadas se ban zentrar en la luenga aragonesa. Bels miembros d'el Corrinche ban fer una presentazión sobre la istoria y l'autualidat de la nuestra lluenga, con l'aduya de la exposizión l'Aragonés, luenga biba. Una de las concllusions prenzipals ba ser que las iniziatibas mosicals en aragonés han estau un d'es motors de bisibilizazión y dinificazión de la lluenga. Rematada la charrada, ba ser prezisament una d'istas iniziatibas –o grupo de mosica popular Chuntos!-- que ba amenizar un bermut mosical en el casal y que ba fer una chicorrona autuazión en la Plaça dels Nazarens.

Finalment, á la tardi, se ban repllegar las concllusions de las dos charradas anteriors en un debate ubierto sobre luenga y identidat. La dibersidat d'opinions que se i ban ascuitar ba contrimostrar que es elements que puen contribuyir á definir una identidat son muito dibersos. Por exemplo, un proyeuto politico y sozial –como el Consello d'Aragón— puen pllegar a chuntar diferents grupos linguisticos en una mesma identidat. Por esgrazia, bi ha pocos exempllos de proyeutos que combinan la esfensa de dibersas reyalidaz linguisiticas con un proyeuto d'alliberazión sozial; puet estar que el de Rojava siga un d'es más esperanzadors. En tot caso, una ideya recurent ba ser que las identidaz son elasticas, y que pa esfender-las cal mirar de respeutar las suyas diferents manifestazions y capas: cal saper compachinar, por exemplo, el respeuto per la unidat d'una luenga y la norma linguistica con el respeuto per es bariants llocals.

Antismás de rezentar la reyalidat llinguistica aragonesa en Tarragona, ista iniziatiba ba serbir pa cuestionar nozions preconzebius sobre la identidat, y ba meter en contauto chent con opinions diferents sobre ista cuestion en un contesto de debate amablle. Querem dar las grazias ta la chent d'el Casal Popular Sageta de Foc per la suya aduya y las suyas contribuzions, y asperem poder partizipar en más iniziatibas parellanas!