Chornadas sobre las lluengas d'Aragón en Tarragona

El cabosemana del 26 i 27 de chunio, baixem ta Tarragona! Tos i esperem!

Remate d'as "Chornadas sobre Irlanda, lengua, mosica y cultura"

O biernes 12 rematón as “Chornadas sobre Irlanda, lengua mosica y cultura”, organizatas por a Colla de Charradors o Corrinche en colaborazión con a Universitat de Barcelona y o Centro Aragonés de Barcelona.

Os actos d’o biernes empezipión con a charrada de King Sweeney en l’edifizio Josep Carner d’a Universitat de Barzelona. Sweeney dio una bisión de diferens aspeutos d’a lengua irlandesa: os suyos orichens, istoria, estructura y mesmo a situazión sozio-lingüistica autual y perspeutibas de futuro.

O irlandés forma parte d’as lenguas d’orichen zeltico, y en l’autulidá tiene alto u baixo 40000 fablans, distribuyius en tres zonas prinzipals en a costa oeste d’Irlanda. Esiste un sistema d’escolarizazión en o que a lengua beicular ye l’irlandés, a libel d’amostranza primaria y bachillerato. A lengua ye presén en meyos de comunicazión y en a siñaletica. 

Seguntes Sweeney, a lengua tiene considerazión, mayormente entre a chen choben, pero ixo no quita que a presión de l’inglés contine fendola una lengua con pocas proyeuzión en o terreno sozial y profesional, situazión que seguntes o que escribe istas ringleras, posiblamén siga disglosica y remate en un prozeso de sustituzión lingüistica de l’irlandés por l’inglés. 

A la presentazión de Sweeney siguié un turno de preguntas, en as que en muitos casos se fazión cotimparanzas con a situazión soziolingüistica d’a lengua aragonesa y d’o suyo esdebenidero, más escuro que o d’o irlandés: sin d’amostranza en as escuelas, sin bisibilidá en meyos de comunicazión ni en programas educatibos, y con a transmisión chenerazional crebando-se. 

Asistens a la chornada en a terraza d'o edifizio Josep Carner d'a
Universitat de Barcelona

Manimenos, a la fin d’a charrada os asistens y organizadors puyón de buena gana ta ra terraza de l’edifici Josep Carner ta fer-se una foto de grupo. Astí remeramos que chuntos estabanos tamién fa un año en ixe puesto zelebrando a trobada “L’aragonés güé”. Dimpués, y de buen implaz, os asistens marcharon a zenar ta o Centro Aragonés de Barcelona. En rematar a zena, Mark Duffy dirixié a beilata mosical. Astí se cantó en irlandés, en inglés, y tamién en as tres lenguas d’Aragón. Uno d’os momentos más emotibos estió cuan Mark Duffy cantó “La quinta brigada”, tema en inglés que remera a os brigadistas irlandeses que luitón con os republicans cuentra o fascismo.

Apunte breu sobre a conferenzia: "El entramado actual de las letras aragonesas (reflexiones sobre la autonomía de la literatura)"

O biernes diya 5 de chunio, miembros d’a colla de charradors O Corrinche, acudimos ta la conferenzia: “El entramado actual de las letras aragonesas (reflexiones sobre la autonomía de la literatura)”, de María Angeles Naval, profesora del departamento de filolochía española d’a Unibersidá de Zaragoza. 

Dimpués d’introduzir o contesto cronoloxico, dende os años 80 dica l’autualidá, Naval rezentó con muito detalle as diferens estruturas editorials y de difusión d’a obra literaria feita por aragoneses, asinas como as tematicas y cheneros. Se i remarcó a figura de Ramón Acín y o suyo papel en a edizión de rebistas literarias, asinas como o papel d'a Instituzión Fernando el Católico, y mesmo que as figuras de muitos escritors aragoneses, como por exemplo a Félix Romeo, Soledad Puértolas, José Luís Corral o Ismael Grasa.

O turno de preguntas estió prou largo y ubrió un debate intresán cuan l’audienzia manifestó que, en charrando de letras aragonesas, ye menester charrar tamién de letras en catalán de Aragón y en aragonés, mayormente cuando istas han dau una obra literaria de calidá y bolumen sinificatibo en o periodo considerau. Ta isto, y en primeras, a ponente se desincusó argumentando que o tetulo d’a conferenzia no yera prou esplizito; t’adibir dimpués que que as zonas an se i charran ixas atras lenguas son chicotas en estensión, y que tamién lo ye o numero de chen que las charra, razons por as cuals ni esiste ni cal asperar un desembolique literario como el que experimenta a literatura española en o país. Atras cuestions que se planteyaron tenión como tema as dotazións y numero de premios literarios y a nezesidá y la salú d’as ferias de libros en Aragón, como a Feria de Monzón.

A la fin, una parte de l’audienzia marchó contenta de biyer como Aragón se desembolica a saberlo bien en terminos de literatura española, aunque a muitos nos quedó a basemia ixa que en charrando de letras en Aragón, un profesor d’unibersidá excluya a dos d’as lenguas propias d’ixe país. Mayormente cuando istas lenguas son minoritarias y amenistan protezión.

Cronica de "San Chorch": un diya en aragonés en a capital catalana

Os diyas 24 y 25 d’Abril zelebremos o 1er “St. Chorch’s, Aragon day”, con a proyezión de documentals, una autuazión teyatral y autuazions mosicals dibersas. O diya 24 se metió en Can Basté a esposizión d’Esther Naval:  Nabateros en a Zinca, o río ye camin. Tamién se pasó o documental Bergantes: lo riu menut, ta o que siguió un ratet de debate sobre a situazión de ixe rio, as autuazions que son posibles, y de como afeutarian a las chens d’a redolada.

O puesto d'os quesos d'a sierra de Guara, con Antonio fendo benta

L’autibidá zentral d’o diya 25 estió a feria Etiquetau, de produtos aragoneses. A feria se plantó en l’espazio d’a plaza de can Basté. Ta era bi acudión una selezión de produtors aragoneses: Quesos d’a sierra de Guara; bins de semontano y Teruel; sabón de Boltaña, El Druida; pacharán El Ordersano; güegos ecoloxicos de Monzón, d’a marca Güego; embutidos de Graus, de Melsa; cucharas de buxo d’a Espuña, y tamién chambretas y atro merchandising en lengua aragonesa, trayiu por Chambretas.es. Ta quitar a sed, bi abié dos barras: a d’a bieras Ordio minero, de Teruel; y a d’a biera Rondadora, de Sobrarbe. A más de tot isto, bi eba a caseta de libros d’o Rolde Aragonés de Barcelona.

O Grupo de Tambors d''o CAB

A ras onze d’a mañana ya yeran toz os tenderetes paraus, o Sol s’ubriba paso, mesmo que o Grupo de tambores y bombos del Centro Aragonés de Barcelona. Con o rebolizió acudió tamién firme chen, que en ixa polida mañana de sabado se feban a gambadeta con a familia o biniban d’o mercau. A meyodía empezipió o bermú mosical, amenizau por as cantas de: Kike Ubieto, El Sobrino del Diablo, y tamién Virgilio Aljama (Escoria Oriental). Dimpués, metiemos mesas y sillas en a plaza ta chentar o menú: ensalada, pollo a la chilindrón y yogur de Fonz.

Por a tardi continó a catafila de chen besitando os puestos y crompando isto aquí, ixotro astí. Entre as chens que beniban en abeba que teneban orixen aragonés, atros bel parién, y o que menos bel recuerdo de biaches por as tierras d’Aragón. En cualsiquier caso, bi abié difusión d’a esistenzia d’a lengua, y os besitans tamién s’amanaron ta os panels d’a esposizión L’aragonés: lengua biba.

Manuel Marqués presentando a Iris Campos Bandrés

A ras zinco d’a tarde empezipió l’autuazión d’o grupo de teyatro Poetián, qui representó testos clasicos de l’aragonés ribagorzán, y interpretó mosicas tradizionals. A sala yera a rebutir y Poetián salíé d’era ta tornar a dentrar pa continar rezebindo una gran cantidad de palmas. Más tarde, se pasó o documental Ambiestas/Anvistas, dirixiu por Iris Campos Bandrés, y que esplica a eboluzión d’a lengua en os ultimos 50 años. Estió Manuel Marqués qui nos presentó a Iris Campos Bandrés, qui mos fazié tamién una chiqueta introduzión t’o documental.

A ras güeito remató a feria Etiquetau, y una bez zenaus, y dentrando a meya nuei, podiemos bailotiar y cantar con Los Jaques de la Sierra y Chundarata. Dos autuazions sobrebuenas, con letras en aragonés, castellán y catalán; y estilos mosicals tan bariaus como o vals, o corrido mexicano, polkas o jotas.

En istos diyas tan espezials, a canto d’a festibidá de San Chorche, emos quiesto amostrar en a ziudá en a que bibimos, Barcelona, que a identidá aragonesa contina biba, a penar d’o que os gubiernos español y aragonés fan y dixan de fer por acotolar-la. 

Corrinche y Rolde partizipan en A diada de Sant Jordi

Uno d'os intes de masima afluenzia, arredol de meya tarde

Un año más, O Corrinche y o Rolde Aragonés de Barcelona han partizipau en a diada de Sant Jordi metendo un puesto de benta de libros.

Iste año a situazión d'o puesto de benta ha estau pribilechiada, chusto debán d'o Gran Teyatro d'o Liceu. Por ixo, o por a gran cantidá de chen que pasó por as Ramblas, iste año s'ha feito record de bentas, con más de 100 exemplars bendius, mayormente en lengua aragonesa.

Tres autors en lengua aragonesa, afincaus
en Catalunya; de izquierda enta
 dreita: Arbués, Castro, y Lamora

O best seller en aragonés ha estau o poemario "Mustang", de Alberto Lamora Coronas, qui estió presén firmando exemplars. Atros escritors aragoneses que se trobón firmando libros estión Andrés Castro y José Arbués Possat.

En a parada se trobaron tamién libros en catalán d'Aragón, aportaus por asoziazions culturals del Baix Aragó, asinas como bels testos en lengua castellana. Cuentez, poesia, nobela, historia, comic ... que millor regalo ta un diya de primabera que un libret!

Resultaus de la rifa de las chornadas de San Chorche

O sabado pasato, en direuto a las 20.30 h, y dentro de las chornadas de St Chorch's Day, en Can Basté, se zelebró la rifa de un lote de produtos aragoneses y una paletilla de pernil de Valderrobres.

Istos estioron os ganadores y os numeros premiaus:

Lote de produtos aragoneses - numero 48 - Ganador: Miquel C.
Paletilla de pernil de Valderrobres - numero 45 - Ganadora: Anna María A.

Aquí tenemos a Miquel C., goyoso ganador de o lote.
Maitín en o CAB se fará entrega de la paletilla a Anna María M. Grazias a totz por partizipar!

Feria de Produtos Aragoneses en Can Basté

Iste sabado, como parti de las chornadas de San Choch's Day que zelebramos en o Centro Cívico Can Basté de Noubarris, bi habrá Feria de Produtos Aragoneses. Se rifará un lote de produtos aragoneses. Tos i asperamos!